Surxondaryo viloyatining Rossiya hududlari bilan savdo-iqtisodiy va investitsiyaviy aloqalarini kengaytirish masalalari muhokama qilindi. Farg‘ona shahrida O‘zbekiston va Rossiya hududlari Kengashining III yig‘ilishi doirasida viloyat hokimi Ulug‘bek Qosimov Novosibirsk viloyati gubernatori Andrey Travnikov hamda Krasnoyarsk o‘lkasi gubernatori Mixail Kotyukov boshchiligidagi delegatsiyalar bilan uchrashdi.
Muloqotlarda avval erishilgan hududlararo kelishuvlarning ijrosi, mavjud loyihalarning holati va yangi hamkorlik yo‘nalishlari ko‘rib chiqildi. Xususan, yangi qo‘shma loyihalarni shakllantirish, investitsiyalarni jalb etish va o‘zaro manfaatli tashabbuslarni amaliyotga tatbiq etishga alohida e’tibor qaratildi.
Tomonlar mavjud salohiyatdan samarali foydalanish, hamkorlikdagi loyihalarni kengaytirish va erishilgan kelishuvlarni amaliy natijalar bilan mustahkamlash bo‘yicha ishlarni davom ettirishga kelishib oldi.
