Jarqo‘rg‘onda chiqindilarni qayta ishlashga yo‘naltirish va aholining ekologik faolligini oshirishga qaratilgan yangi imkoniyat yaratildi. “Qorayantoq” mahallasidagi “Do‘stlik” ko‘chasi, 6-uyda ichimlik idishlarini avtomatik qabul qiluvchi fandomat o‘rnatildi.
Loyiha O‘zbekiston Respublikasi Ekologiya va iqlim o‘zgarishi milliy qo‘mitasi tashabbusi bilan ichimlik idishlarini yig‘ish va saralash sohasida 50 yildan ortiq tajribaga ega Norvegiyaning TOMRA kompaniyasi bilan hamkorlikda amalga oshirilmoqda.
Qurilma plastik, shisha va alyuminiy idishlarni avtomatik qabul qilib, ularni qayta ishlash uchun alohida yig‘ish va saralash imkonini beradi. Fandomatga topshirilgan har bir idish uchun 150 so‘m miqdorida pul rag‘bati olish yoki ushbu mablag‘ni xayriya va daraxt ekish tashabbuslariga yo‘naltirish mumkin.
