Xorijning nufuzli oliygohlarida o‘qish yoki malaka oshirishni istagan yoshlar uchun imkoniyatlar haqida Termiz davlat universitetida ochiq muloqot tashkil etildi. Unda “El-yurt umidi” jamg‘armasi mas’ullari, viloyat Yoshlar ishlari boshqarmasi vakillari hamda hududdagi oliy ta’lim muassasalari talabalari ishtirok etdi.
Muloqotda jamg‘armaning stipendiya dasturlari, xorijda bakalavriat, magistratura va doktoranturada tahsil olish, shuningdek, mutaxassislar uchun stajirovka o‘tash imkoniyatlari haqida ma’lumot berildi. Talabalar o‘zlarini qiziqtirgan savollariga jamg‘arma vakillaridan bevosita javob olib, xorijda ta’lim olish uchun mavjud imkoniyatlar va tanlovlarda ishtirok etish tartibi bo‘yicha zarur tavsiyalarga ega bo‘ldi.
Bunday uchrashuvlar yoshlarning xalqaro ta’lim imkoniyatlari haqidagi bilimini kengaytirib, kelgusida xorijda tahsil olish va tajriba orttirish uchun aniq yo‘nalish belgilashiga yordam bermoqda.
