Jarqo‘ton yodgorligidan bronza davriga oid noyob arxeologik topilma aniqlandi. O‘zbek va italiyalik olimlar bosh suyagida trepanatsiya — jarrohlik amaliyoti izlari saqlangan bola qoldiqlarini o‘rganib, uning taxminan 4 ming yillik ekanini ma’lum qildi.
Turkiyaning “Arkeofili” jurnali xabar berishicha, mazkur topilma Osiyodagi eng qadimiy jarrohlik amaliyoti namunalaridan biri hisoblanadi. Mutaxassislar bu kashfiyot qadimgi Oks sivilizatsiyasida tibbiyot va inson anatomiyasi haqidagi bilimlar yuqori darajada bo‘lganini ko‘rsatishini ta’kidlamoqda.
Topilma nafaqat O‘zbekistonning boy tarixiy merosini yana bir bor namoyon etmoqda, balki mintaqada tibbiyot tarixi ildizlari o‘ylanganidan ancha qadimiy ekanini ham tasdiqlamoqda.
