Navro‘z umumxalq bayrami munosabati bilan Bandixon tumanida xalqimizning qadimiy an’ana va qadriyatlarini tarannum etuvchi uloq-ko‘pkari musobaqasi tashkil etildi. Tuman hokimligi tashabbusi hamda hamkor tashkilotlar ko‘magida o‘tkazilgan tadbir bayram saylining eng qizg‘in va tomoshabop lahzalaridan biriga aylandi.
Ko‘pkari — xalqimizning azaliy o‘yinlaridan biri bo‘lib, unda mardlik, jasorat, epchillik va qat’iyat kabi fazilatlar namoyon bo‘ladi. Shu bois bu o‘yin azaldan “er yigitlar o‘yini” sifatida e’zozlab kelinadi.
Musobaqada tumanning turli hududlaridan hamda qo‘shni tumanlardan kelgan chavandozlar o‘z mahoratini namoyish etdi. Polvonlar o‘rtasidagi bahslar qizg‘in va murosasiz ruhda kechib, ko‘plab tomoshabinlarga bayramona kayfiyat ulashdi.
Navro‘z sayli doirasida o‘tkazilayotgan bunday tadbirlar milliy urf-odat va qadriyatlarimizni asrab-avaylash, yosh avlodni vatanparvarlik ruhida tarbiyalash hamda jamiyatda hamjihatlik va birdamlikni mustahkamlashda muhim ahamiyat kasb etmoqda.
