Kunchiqish mamlakatiga amalga oshirilgan tashrif va delegatsiyalar bilan o‘tkazilgan muzokaralar natijasida erishilgan kelishuvlarga muvofiq, Termiz shahrida O‘zbekiston–Yaponiya texnologiyalar universiteti barpo etilmoqda.
Viloyat hokimi Ulug‘bek Qosimov mazkur oliy ta’lim muassasasi uchun qurilayotgan binoda olib borilayotgan qurilish-ta’mirlash ishlari holati bilan tanishdi. Mas’ullarga ishlarni jadallashtirish va tasdiqlangan loyiha asosida amalga oshirish bo‘yicha tegishli topshiriqlar berildi.
Shundan so‘ng, viloyat Ichki ishlar boshqarmasining situatsion markazi binosi qurilishiga start berildi.
Shuningdek, Termiz shahridagi 19-sonli davlat maktabgacha ta’lim tashkilotini 360 o‘rinli qo‘shimcha bino qurish orqali rekonstruksiya qilish hamda jihozlash ishlari ko‘zdan kechirildi. Bog‘chada jihozlash ishlarini sifatli yakunlash, ta’lim-tarbiya jarayonini samarali tashkil etish, shuningdek, bolalarga xorijiy tillarni o‘yinli uslublarda o‘rgatishga qaratilgan to‘garaklar faoliyatini yo‘lga qo‘yish yuzasidan mas’ullarga aniq vazifalar belgilandi. Mazkur bog‘cha qurilish ishlaridan so‘ng 720 o‘ringa ega bo‘ladi hamda xorijiy tillarni chuqurlashtirib o‘rgatishga ixtisoslashtiriladi.
