Yangi yil bayrami arafasida Bandixon tumanida “Prezident archasi” doirasida bayram tadbirlari tashkil etildi. Tuman markazidagi “Yoshlar sayilgohi”da bo‘lib o‘tgan teatrlashtirilgan tomoshalar bolajonlarga ko‘tarinki kayfiyat ulashdi.
Shu munosabat bilan tuman hokimligida o‘tkazilgan tadbirda 3–16 yoshdagi ota-ona qarovisiz qolgan 16 nafar bola ishtirok etdi. Tuman hokimi Abdumalik Allamuradov bolajonlarni Prezidentimiz nomidan Yangi yil bilan tabriklab, 24 turdagi o‘quv qurollari va 34 turdagi shirinliklardan iborat “Prezident sovg‘alari”ni topshirdi.
Tadbir davomida Qorbobo, Qorqiz hamda ertak qahramonlari ishtirok etib, bolalarga unutilmas quvonch ulashdi.
