Ilon Mask asos solgan Neuralink kompaniyasi fikrlarni bevosita matnga aylantiruvchi noyob implant ustida ish olib bormoqda. Kompaniya ma’lumotiga ko‘ra, oktyabr oyidan boshlab mazkur texnologiya amaliy sinovdan o‘tkaziladi.

Innovatsiyaning asosiy maqsadi – nutq qobiliyatini yo‘qotgan yoki jiddiy kasallik tufayli muloqotda qiynalayotgan insonlarga yordam berish. Qurilma inson miyasi faoliyatini bevosita o‘qib, “miyadan ovozga” to‘g‘ridan-to‘g‘ri o‘tishni ta’minlaydi. Bu esa na klaviatura, na boshqa vositalarsiz faqat tasavvur orqali gapni ifodalash imkonini beradi.

Neuralink prezidenti texnologiyaning mohiyatini shunday izohladi:

“Agar siz biror gapni ichingizda aytayotganingizni tasavvur qilsangiz, implant uni eshitib, matnga aylantira oladi.”

Mazkur tashabbus insoniyat hayotini tubdan o‘zgartirishi, jumladan, imkoniyati cheklangan insonlar uchun yangi imkoniyatlar ochishi kutilmoqda.