Kutubxona fondi 1200 kitobga boyidi

Bugundan barcha hududlarda “O‘zbekiston — kitobxonlar yurti” shiori ostida V Respublika “Kitobxonlik haftaligi” tadbirlariga start berildi. 27-aprel kuniga qadar davom etadigan haftalik dasturiga ko‘ra turli tadbirlar, kechalar, bayramlar o‘tkazilishi reja qilingan.
Ilk kundanoq Angor tumanidagi Axborot-kutubxona markazida “Kitobxonlik haftaligi”ning ochilish marosimi bo‘lib o‘tdi. Tadbirda tuman hokimi Qosim Mardonov ishtirok etdi. Hokim ulug‘ dargohga quruqqo‘l bilan kelmadi, balki tuman yoshlari uchun eng sara adabiyotlarni tuhfa qildi.
Haftalikning ochilishini angorlik kitobxon yoshlar katta xursandchilik bilan qarshi olishdi. Tadbirda tuman hokimi yoshlarning kitob o‘qishga bo‘lgan qiziqishini kuchaytirish, ularning kitob bilan do‘st bo‘lishiga, aholining kitobxonlik saviyasini yanada oshirishga qaratilgan tadbirlarni muntazam o‘tkazish va ko‘rik tanlovlar tashkil qilish bo‘yicha o‘z tavsiyalarini berib o‘tdi.
So‘zga chiqqanlarning bari yoshlarga eng ezgu tilaklarni bildirish bilan birga, ularni kitobxonlikka chorladi. Qolaversa, kitob bilan kitobning farqi, mutolaaning foydalari haqida to‘xtakishdi.
Birinchi kunning o‘zidayoq tadbir ishtirokchilari tomonidan kutubxona fondi uchun 1200 dona kitoblar sovg‘a qilindi.
Yakunida yosh kitobxonlar tomonidan Vatanimizni madh etuvchi she’rlar va qo‘shiqlar ijro etildi.