Darsdan soʻng qoʻshimcha daromad

Ish bilganga ming tanga deb bejiz aytishmagan. Ishning ko‘zini biladigan yoshlarimiz bugungi kunda vaqtlaridan unumli va mazmunli foydalanishayotir. Nafaqat, ta’lim-tarbiya olib, fan sirlarini o‘rganishmoqda, balki o‘zlari qiziqqan kasb-hunarlarni-da o‘zlashtirib, bilganlarini amaliyotda qo‘llay olishayotgani quvonarli hol. Bu o‘zi va o‘zgalar uchun manfaatli ham. Aytaylik, tikish-bichishni bilgan qizlar tikuvchilik bilan mashg‘ul bo‘lishsa, IT sohasini o‘rganganlar ham kam bo‘lishmayapti, bilimlari atrofdagilarning-da og‘irini yengil, mushkulini oson qilmoqda.
Sariosiyo tumanida joylashgan 7-, 18- va 68-sonli umumtaʼlim maktabi oʻquvchilari hozirdanoq kasb-hunar o‘rganib, mehnat bozorida oʻz oʻrinlarini egallashmoqda. Oʻquvchilar asosan, dasturlash va tikuvchilik yoʻnalishlarida faoliyat olib borishadi. Albatta, oʻquvchilar ushbu natijaga darsdan soʻng boʻlib oʻtadigan toʻgarak, innovatsion loyihalar va kasbiy taʼlim dasturlariga jalb etish orqali erishishmoqda.