Koreya ta’lim markazi vakillari vohamizda

Ta’lim sohasida o‘zaro tajribalarni almashish, ilg‘or pedagogik texnologiyalarni jalb qilish maqsadida Janubiy Koreya ta’lim markazi bilan hamkorlik yo‘lga qo‘yilgan. Bir muddat avval viloyatimizning bir guruh ta’lim sohasi mutasaddilari ushbu davlatning ta’lim tizimidagi tajribalarini o‘rganib qaytgan edi.
Mazkur hamkorlik doirasida Janubiy Koreyaning ta’lim markazi vakillari Surxondaryo viloyatiga tashrif buyurdi. Mehmonlar munosib kutib olinib, viloyat “Barkamol avlod” bolalar maktabi, Angor tumanidagi 1-sonli maktab, Termiz shahridagi “Volshebniy zamok” davlat-xususiy sherikchilik asosidagi nodavlat maktabgacha ta’lim tashkilotlari bilan tanishtirildi.
Mehmonlar ta’lim jarayonlari, xorijiy tillar, xususan, koreys tili darslarining borishi bilan tanishishdi hamda o‘quvchilar bilan suhbat qilishdi. Davlatimiz rahbarining tashabbusi bilan yo‘lga qo‘yilgan xorijiy tillarni o‘qitish tizimi samarali tashkil etilganligi mehmonlar tomonidan e’tirof etildi.
Shuningdek, Koreyaning ta’lim delegatsiyasi vakillari Termiz tumanida joylashgan Fayoztepa va Qoratepa ibodatxona majmualari bilan ham tanishishdi.