Bilimi “Zakovat”da sinaldi

Yangi o‘quv yili boshlanishi bilan o‘quvchilar o‘qib o‘rganishga, bilimlarini sinovdan o‘tkazishga kirishib ketdilar. Ilk kunlardanoq darslar bilan bir qatorda turli tadbirlar, bilimlar bellashuvlari boshlanib ketdi. Umumiy oʻrta taʼlim maktablari oʻquvchilari o‘rtasida bo‘lib o‘tgan “Zakovat” intellektual oʻyini ham ana shunday bellashuvlarning biri bo‘ldi.
Tanlovning Angor tumani bosqichida tumandagi 48 ta maktab jamoalari oʻz bilimlarini sinovdan oʻtkazishdi. O‘yin “Zakovat intellektual klubi” NNT Surxondaryo viloyati hududiy koordinatori Salohiddin Odilov tomonidan olib borildi. Saralashlarsiz 30 ta savoldan iborat oʻyin qiziqarli va murosasiz bellashuvlarga boy o‘tdi. Asosiysi, o‘quvchi-yoshlar o‘z bilim va salohiyatlarini sinovdan o‘tkazdilar.
Yakuniy natijalarga koʻra, 3-o‘rin 3-maktab, 2-o‘rin 15-maktab jamoasiga nasib etgan bo‘lsa, 1-o‘rinni 29-maktab jamoasi qo‘lga kiritdi. Gʻolib jamoalar tashkilotchilar tomonidan diplom bilan taqdirlandilar va musobaqaning viloyat bosqichiga yoʻllanmani qoʻlga kiritishdi.