TerDUda Yapon tili markazi tashkil etiladi

Til o‘rganishning foydasi nihoyatda katta. Buni bilgan yosh-u keksa til o‘rganishga kirishgan. Bir necha tillarni o‘zlashtirganlar ham oramizda ko‘pchilikni tashkil etadi. Birinchi navbatda, til bilish o‘sha tilde so‘zlashadigan davlatlarga borish, o‘qish, ishlash, yashash imkonini beradi. Bu esa bilim, tajriba almashishga sharoit yaratadi. Shu sababdan ham oliy o‘quv dargohlarida xalqaro hamkorlik aloqalari yo‘lga qo‘yilib, xorijiy tillarni o‘sha tilde so‘zlashuvchi mutaxassislardan o‘rganish amaliyoti joriy etilayotir.
2023-yilning dekabr oyida Surxondaryo viloyati hokimi boshchiligidagi delegatsiyasining Yaponiya davlatiga qilgan tashrifi davomida turli sohalarda qator kelishuvga erishilgan edi. Shunga ko‘ra, kun chiqar mamlakatning ishbilarmonlari viloyatimizga qiziqishlari ortib boshladi va ulardan bir guruhi hamkorlik uchun vohamizga tashrif buyurdi.
Termiz davlat universiteti rektori A.Toshqulov Yaponiyaning ilg‘or kompaniyalari uchun malakali mutaxassislar tayyorlab beruvchi “Support Organization for Advanced Foreign Students Co., Ltd” (SOAFS) kompaniyasi rahbari Junichi Nakamurani qabul qildi. Uchrashuvda ilm-fan va texnologiya sohasida yaqindan hamkorlik qilish, malakali kadrlar tayyorlash bo‘yicha hamkorlik aloqalari muhokama qilindi.
Yakunda Termiz davlat universitetida yaponiyalik mutaxassislarni jalb etgan holda xorijiy va mahalliy kompaniyalar uchun tajribali kadrlar tayyorlaydigan Yapon til markazini tashkil etishga kelishib olindi.