Umra ziyoratiga jo‘natdi

Ko‘pincha saxovatpesha tadbirkor va ishbilarmonlarning qilgan ezgu ishlari haqida to‘lqinlanib so‘zlaymiz. O‘zgalarga namuna qilib ko‘rsatamiz. Maqsad atrofimizda ana shunday insonlar safi kengayib, har birimizni ezgulikka, yaxshilikka chorlashlaridan umidvor bo‘lamiz. Aslida yaxshilik qilish, ezgu ishlarni amalga oshirish uchun boy bo‘lish kerak emas, shunchaki istak va xohish bo‘lsa, kifoya.
Oltinsoy tumanidagi “Shoxcha” mahallasida istiqomat qiluvchi, 2-guruh nogironi 22 yoshli yosh dasturchi Bobur Xursandov ana shunday qalbi pok, ezgulikka oshno yigit. U tuman hokimligi ko‘magi bilan Toshkent shahridagi “Najot ta’lim” o‘quv markazida IT yo‘nalishida tahsil olish barobarida turli tanlovlarda g‘oliblikni qo‘lga kiritib kelayotganidan ozmi-ko‘pmi xabarimiz bor. Bobur ana shunday tanlovlardan birining respublika bosqichida faxrli 1-o‘rinni qo‘lga kiritib, 38 million so‘mlik mukofotga ega bo‘lganiga nima deysiz? Bu mablag‘ga qandaydir rejani amalga oshirish, mustaqil hayotga o‘z yo‘lini tanlash mumkin. Ammo, Bobur bunday qilmadi, bu mablag‘ga bobosi va momosini Muborak Umra safariga yubordi.