Termiz tumani “Orol” mahallasidagi mingga yaqin bola zamonaviy maktabda tahsil olish imkoniyatiga ega bo‘lgani eshitgan quloqqa xush yoqadi. Ushbu 3-sonli maktab viloyatdagi 61 ta og‘ir toifadagi maktablar ro‘yxatiga kiritilib, 3,9 milliard so‘mlik loyiha asosida to‘liq rekonstruksiya qilindi. Qurilish talablari asosida to‘liq ta’mirlangan va zamonaviy jihozlar bilan jihozlangan maktabning foydalanishga topshirilishiga viloyat hokimi Ulug‘bek Qosimov ham ishtirok etdi.
Tadbirda so‘z olgan mahalla nuroniylari, o‘qituvchilar hamda faollar hukumatimizning ta’limga, xususan, maktablar sharoitlarini yaxshilashga qaratayotgan e’tiboridan mamnun bo‘lib, o‘z minnatdorchiligini bildirishdi.
Shuningdek, Termiz tumanidagi yangi aholi yashash punktlaridan biri bo‘lgan “Yangiyer” mahallasida “Tashabbusli budjet” loyihasi doirasida 2,2 milliard so‘mga bunyod etilgan, zamonaviy shart-sharoitlarga ega Yangiyer oilaviy shifokorlik punktining foydalanishga topshirilishi esa qo‘shaloq xursandchilik bo‘ldi deyish mumkin. Endilikda ushbu hudud aholisi ham o‘z uyi yaqinida malakali tibbiy xizmatdan foydalanish imkoniyatiga ega bo‘ldi.
