Ayni kunlarda Qoraqalpog‘iston Respublikasining Taxiatosh tumanidan 32 nafar yosh Surxondaryoda bo‘lib turibdi. Tashrif davomida yoshlar viloyatdagi turli tadbirlar, uchrashuvlar va ma’naviy-ma’rifiy dasturlarda ishtirok etib, vohaning hayoti, uning yoshlarga yaratib berilayotgan imkoniyatlari bilan yaqindan tanishmoqda.
Mazmunli tashrif doirasidagi navbatdagi uchrashuv Surxondaryo viloyati hokimi Ulug‘bek Qosimov bilan bo‘lib o‘tdi. Samimiy muloqotda hokim yoshlar bilan ochiq suhbatlashib, ularning taassurotlari, qiziqishlari va kelgusidagi rejalari bilan qiziqdi.
Suhbat davomida yoshlarni har tomonlama qo‘llab-quvvatlash, ularning bilim va ko‘nikmalarini rivojlantirish, bo‘sh vaqtini mazmunli tashkil etish hamda vatanparvarlik ruhida tarbiyalash masalalari yuzasidan fikr almashildi.
Ayniqsa, “Jasorat maktabi” loyihasining yoshlar hayotidagi o‘rni alohida ta’kidlandi. Bunday loyihalar yoshlarning jismoniy, ma’naviy va ruhiy tayyorgarligini mustahkamlash, ularda Vatanga sadoqat, jasorat va mas’uliyat tuyg‘ularini shakllantirishda muhim ahamiyat kasb etishi qayd etildi.
Uchrashuv davomida yoshlar ham o‘zlarini qiziqtirgan savollar bilan murojaat qilib, fikr va takliflarini bildirdilar. Erkin va samimiy ruhda kechgan muloqot ular uchun Surxondaryodagi mazmunli tashrifning yana bir unutilmas lahzasiga aylandi.
