Profilaktika inspektorlarining uzoq yillik va samarali xizmatini munosib rag‘batlantirishga qaratilgan yangi faxriy unvon joriy etilishi taklif qilinmoqda.
Oliy Majlis Qonunchilik palatasida “O‘zbekiston Respublikasida xizmat ko‘rsatgan huquqbuzarliklar profilaktikasi inspektori” faxriy unvonini ta’sis etish haqidagi qonun loyihasi muhokama qilindi. Mazkur unvon jamoat xavfsizligini ta’minlash, mahallalarda xavfsiz muhit yaratish va huquq-tartibotni mustahkamlash yo‘lida ko‘p yillar samarali xizmat qilgan, kasbiy mahorati va fidoyiligi bilan namuna ko‘rsatgan profilaktika inspektorlariga berilishi nazarda tutilmoqda.
Qonun loyihasida faxriy unvonning nomi, uni berishning huquqiy asoslari hamda ko‘krak nishonining tavsifini belgilash taklif etilgan. Demak, mahallada huquqbuzarliklarning oldini olish, fuqarolar xavfsizligini ta’minlash va jamoat tartibini mustahkamlash bilan bevosita shug‘ullanuvchi profilaktika inspektorlarining xizmatini alohida e’tirof etishning yangi shakli paydo bo‘lishi mumkin.
