Inson hayoti va xavfsizligini ta’minlash, favqulodda vaziyatlarning oldini olish hamda bunday holatlarda tezkor yordam ko‘rsatish tizimini takomillashtirish jamiyat taraqqiyotining muhim mezonlaridan biridir. Shu bois Surxondaryoda qutqaruv xizmatlarining moddiy-texnik bazasini mustahkamlash va mutaxassislar uchun zamonaviy sharoit yaratishga alohida e’tibor qaratilmoqda.
Ana shu yo‘nalishdagi ishlar doirasida Sariosiyo va Jarqo‘rg‘on tumanlaridagi qutqaruv qismlari hamda viloyat Favqulodda vaziyatlar boshqarmasining Hayot faoliyati xavfsizligi o‘quv markazi zamonaviy talablar asosida barpo etilib, foydalanishga topshirildi.
Tantanali tadbirlarda Favqulodda vaziyatlar vazirining o‘rinbosari Rustam Jumayev va viloyat Favqulodda vaziyatlar boshqarmasi boshlig‘i Sharof Shukurov ishtirok etdi.
Yangi obyektlar qutqaruvchilar uchun munosib xizmat sharoitini yaratish bilan birga, favqulodda vaziyatlarga tezkor va samarali javob qaytarish imkoniyatlarini ham kengaytiradi. Bu esa, eng avvalo, aholi hayoti va xavfsizligini ishonchli himoya qilishga xizmat qiladi.
Shuningdek, Sariosiyo va Jarqo‘rg‘on tumanlari qutqaruv qismlariga bittadan zamonaviy maxsus qutqaruv texnikasi topshirildi.
