Termiz davlat universitetida Germaniyaning Myunster universiteti professori Silvia Reuvekamp hamda Bergishe Vuppertal universiteti professori Matthias Martinez bilan uchrashuv bo‘lib o‘tdi.
Muloqotda universitetlar o‘rtasidagi akademik hamkorlikni yangi bosqichga olib chiqish masalalari muhokama qilindi. Xususan, Erasmus+ dasturi doirasida xalqaro yozgi maktab tashkil etish, nemis tili o‘qituvchilarining Myunster universitetida malaka oshirishi va ilmiy stajirovka o‘tashini yo‘lga qo‘yish, shuningdek, ta’lim jarayoniga germaniyalik mutaxassislarni jalb etish bo‘yicha takliflar bildirildi.
Tomonlar Nemis tili markazini tashkil etish, germanistika yo‘nalishida qo‘shma ilmiy loyihalarni amalga oshirish, xalqaro onlayn ilmiy jurnal yaratish hamda akademik almashinuv va qo‘shma ta’lim dasturlarini rivojlantirish istiqbollarini ham ko‘rib chiqdilar.
Uchrashuvda arxeologiya yo‘nalishidagi hamkorlikka ham alohida e’tibor qaratildi. Germaniya tomoni qo‘shma tadqiqotlar, arxeologik ekspeditsiyalar va ilmiy-amaliy loyihalarni amalga oshirishga qiziqish bildirdi.
Tashrif yakunida ilgari surilgan tashabbuslarni bosqichma-bosqich hayotga tatbiq etish va Termiz davlat universitetining xalqaro ilmiy-akademik hamkorliklarini yanada kengaytirish bo‘yicha kelishuvlarga erishildi.
