Yoshlarni xalqaro mehnat bozorida raqobatbardosh kasblarga tayyorlash va ta’lim sifatini oshirish yo‘lidagi xalqaro hamkorlik izchil kengaymoqda. Bu esa zamonaviy kasblarni egallash va xorijda malaka oshirish uchun yangi imkoniyatlar yaratmoqda.
Shu maqsadda Kasbiy ta’lim agentligi hamda Janubiy Koreyaning INHA Technical College vakillari o‘rtasida hamkorlik memorandumi imzolandi. Kelishuvga ko‘ra, Urganch va Toshkent shahridagi texnikumlarda “Bort kuzatuvchilarni tayyorlash” (Cabin Crew) yo‘nalishi yo‘lga qo‘yiladi.
Hamkorlik doirasida 2027-yildan INHA kollejining ikki yillik ta’lim dasturlari, 6 oylik qisqa muddatli kurslar hamda 1+1 qo‘shma ta’lim tizimi joriy etilishi rejalashtirilgan. Shuningdek, pedagoglar malakasini oshirish va o‘quvchilarning Janubiy Koreyada amaliyot o‘tashi ham yo‘lga qo‘yiladi.
Mazkur loyiha mamlakatimizda aviatsiya sohasi uchun malakali kadrlar tayyorlash, yoshlarning xalqaro tajriba orttirishi va ularning bandlik imkoniyatlarini kengaytirishda muhim qadam bo‘ladi.
