Ba’zan eng muhim natija sud qarorlari yoki ijro hujjatlari emas, balki yana birlashgan oila va kulgisi qaytgan farzandlardir. Chunki mustahkam oila — jamiyat barqarorligining eng ishonchli asosidir.
Bandixon tumanidagi Rashidovlar oilasida yuzaga kelgan kelishmovchiliklar ajrim va aliment undirishgacha yetib borgan edi. Biroq Majburiy ijro byurosi davlat ijrochilari tomonlar bilan olib borgan suhbatlar va murosa yo‘lidagi sa’y-harakatlar samara berdi.
Natijada er-xotin o‘zaro kelishuvga erishib, oila qayta tiklandi. Eng muhimi, uch nafar farzand yana ota-ona mehri bag‘riga qaytdi. Shundan so‘ng aliment bo‘yicha ijro hujjati undiruvchining ixtiyoriy arizasiga asosan qaytarib olindi.
Bu voqea har bir saqlab qolingan oila ortida farzandlar baxti, mehr-oqibat va jamiyat kelajagi mujassam ekanini yana bir bor tasdiqlaydi.
