Yoshlarning xalqaro fan olimpiadalaridagi muvaffaqiyati nafaqat ularning shaxsiy yutug‘i, balki mamlakat ta’lim tizimi salohiyatining ham muhim ko‘rsatkichidir. Bunday natijalar ilm-fanga qiziqayotgan yangi avlod uchun kuchli rag‘bat bo‘lib xizmat qiladi.
Xitoy Xalq Respublikasida bo‘lib o‘tgan 67-Xalqaro matematika olimpiadasida (IMO 2026) O‘zbekiston terma jamoasi 2 ta kumush va 3 ta bronza medalini qo‘lga kiritdi.
Kumush medal sohiblaridan biri — Termiz shahridagi 14-sonli umumta’lim maktabi o‘quvchisi Elshod O‘ralov bo‘ldi. Uning ushbu natijasi voha yoshlari salohiyati va iqtidorining xalqaro maydondagi yana bir yorqin e’tirofi bo‘ldi.
119 mamlakatdan 685 nafar iqtidorli o‘quvchi ishtirok etgan nufuzli olimpiadadagi ushbu muvaffaqiyat O‘zbekistonda iqtidorli yoshlarni qo‘llab-quvvatlash va ularning ilmiy salohiyatini rivojlantirishga qaratilgan sa’y-harakatlar samarasini yana bir bor tasdiqladi.
