Maktabgacha ta’limga yaratilayotgan zamonaviy sharoitlar bolalarning ilk bilim va tarbiya oladigan muhitini yanada sifatli tashkil etishga xizmat qilmoqda. Yangi bog’chalar esa nafaqat ta’lim sifati, balki mahallalar ijtimoiy infratuzilmasining rivojlanishida ham muhim o’rin tutmoqda.
Shu maqsadda Muzrabot tumanining Mehrigiyoh mahallasida 120 o’rinli yangi davlat maktabgacha ta’lim tashkiloti foydalanishga topshirildi. Ochilish marosimida tuman hokimi Abdulla Mamatqulov, nuroniylar, mahalla faollari hamda jamoatchilik vakillari ishtirok etdi.
Yangi bog’chada zamonaviy o’quv-tarbiya xonalari, yotoqxona, oshxona, musiqa va sport mashg’ulotlari uchun maxsus xonalar tashkil etilib, hudud obodonlashtirildi. Muassasada bolalarning sifatli ta’lim olishi va har tomonlama kamol topishi uchun barcha zarur sharoitlar yaratilgan.
Mazkur ta’lim maskani Mehrigiyoh mahallasidagi oilalar, ayniqsa, farzandlarini maktabgacha ta’lim bilan qamrab olishni istagan ota-onalar uchun muhim imkoniyat yaratadi.
