Atrof-muhitga mas’uliyatli munosabatni shakllantirish, eng avvalo, bolalik davridan boshlanadi. Shu bois maktabgacha ta’lim tizimida ekologik tarbiya nafaqat bilim, balki kelajak avlodning hayotiy qadriyatlarini shakllantiruvchi muhim yo‘nalish hisoblanadi.
Maktabgacha va maktab ta’limi vazirligi tavsiyasiga muvofiq Boysun tumanidagi 11-maktabgacha ta’lim tashkilotida “Tabiat va suv – hayot manbai” mavzusida seminar tashkil etildi.
Unda maktabgacha ta’lim tashkilotlari rahbarlari va pedagoglari bolalarda tabiatga mehr, ekologik madaniyat, suvni tejash va tabiiy resurslardan oqilona foydalanish ko‘nikmalarini shakllantirish masalalarini muhokama qildilar. Tadbir davomida ekologik mavzudagi amaliy mashg‘ulotlar va madaniy chiqishlar namoyish etilib, interaktiv ta’lim usullari bo‘yicha tajriba almashildi.
Seminar ekologik tarbiyani kundalik ta’lim jarayoniga yanada samarali joriy etish va yosh avlodda tabiatni asrash mas’uliyatini mustahkamlashga xizmat qildi.
