Har qanday bilim amaliyot bilan uyg‘unlashgandagina mustahkam ko‘nikmaga aylanadi. Ayniqsa, chaqiriqqa qadar boshlang‘ich tayyorgarlik mashg‘ulotlarida zamonaviy o‘quv jihozlaridan foydalanish o‘quvchilarning bilimini mustahkamlab, ularda mas’uliyat, intizom va vatanparvarlik tuyg‘ularini yanada kuchaytiradi.
Shu maqsadda Qiziriq tumanidagi umumta’lim maktablarining ChQBT xonalari mahalliy budjet hisobidan ajratilgan 120 million so‘m evaziga zamonaviy o‘quv jihozlari bilan ta’minlandi. Maktablarga nishon, kompas, avtomat va pichoq maketlari, mina ko‘rsatkich, maxsus belkurak, bayroq komplekti hamda boshqa zarur o‘quv vositalari yetkazib berildi.
Mazkur jihozlar darslarni yanada samarali va qiziqarli tashkil etish, o‘quvchilarning amaliy tayyorgarligini oshirish hamda harbiy-vatanparvarlik ruhidagi tarbiyani kuchaytirishga xizmat qiladi.
