Fuqarolarning huquq va erkinliklarini ishonchli himoya qilish, odil sudlovni ta’minlash hamda sud tizimining ochiqligi va shaffofligini oshirish bugungi islohotlarning ustuvor yo‘nalishlaridan biri bo‘lib qolmoqda. Bu boradagi amalga oshirilayotgan ishlar Surxondaryo viloyati sudida o‘tkazilgan matbuot anjumanida atroflicha tahlil qilindi.
Anjumanda 2026-yilning birinchi yarim yilligida fuqarolik, jinoyat va iqtisodiy sudlar faoliyati, jismoniy hamda yuridik shaxslar murojaatlari, shuningdek, huquqiy targ‘ibot ishlari yuzasidan erishilgan natijalar haqida ma’lumot berildi.
Qayd etilishicha, fuqarolik sudlari tomonidan olti oy davomida 11 ming 732 ta fuqarolik ishi va 5 ming 520 ta material ko‘rib chiqilgan. Jinoyat ishlari bo‘yicha esa 2 ming 175 ta ish ko‘rilib, 2 ming 788 nafar shaxsga nisbatan sud hukmi chiqarilgan. Bu ko‘rsatkich o‘tgan yilning mos davriga nisbatan qariyb 20 foizga oshgan.
Matbuot anjumanida sud tizimini raqamlashtirish borasidagi islohotlarga ham alohida e’tibor qaratildi. Ta’kidlanganidek, fuqarolarning sudga murojaat qilish, ariza yuborish, sud hujjatlarini olish va ishlar jarayonini kuzatish xizmatlari elektron shaklga o‘tkazilib, bu odil sudlovning ochiqligi va qulayligini ta’minlamoqda.
Shuningdek, sudlarda korrupsiyaning oldini olish, manfaatlar to‘qnashuviga yo‘l qo‘ymaslik, “Raqamli sud” va “Aqlli sud” tizimlarini joriy etish, zamonaviy infratuzilmani rivojlantirish hamda malakali sud kadrlarini tayyorlash bo‘yicha amalga oshirilayotgan ishlar yuzasidan ham fikr almashildi.
Ta’kidlanganidek, sud-huquq tizimida olib borilayotgan bunday islohotlar fuqarolarning odil sudlovga bo‘lgan ishonchini mustahkamlash, ularning huquq va qonuniy manfaatlarini samarali himoya qilishga xizmat qilmoqda.
