Maktabgacha ta’limni rivojlantirish va bolalarni sifatli ta’lim bilan qamrab olish kelajak taraqqiyotiga qaratilgan eng muhim investitsiyalardan biridir. So‘nggi yillarda bu yo‘nalishda hududlarda zamonaviy ta’lim maskanlari barpo etilib, yosh avlod uchun munosib sharoitlar yaratilmoqda.
Shu maqsadda Muzrabot tumanining “Xalq yo‘li” mahallasida 90 nafar bolaga mo‘ljallangan zamonaviy davlat maktabgacha ta’lim tashkiloti foydalanishga topshirildi. Ochilish marosimida tuman hokimi, nuroniylar, mutasaddilar va mahalla faollari ishtirok etdi. Mehmonlar bog‘chada yaratilgan zamonaviy o‘quv va tarbiya sharoitlari bilan tanishdi.
Yangi bog‘chaning ishga tushirilishi maktabgacha ta’lim qamrovini kengaytirish, bolalarning zamonaviy va xavfsiz muhitda tarbiya olishini ta’minlash hamda ota-onalar uchun qulay imkoniyatlar yaratish yo‘lida muhim qadam bo‘ldi.
