Tabiatni asrash va biologik xilma-xillikni saqlab qolish bugungi kunning eng muhim ekologik vazifalaridan biridir. Shu maqsadda O‘zbekistonda noyob yovvoyi hayvonlarni himoya qilishga qaratilgan yangi cheklov joriy etildi.
Hukumat qaroriga ko‘ra, 2026-yil 1-avgustdan 2028-yil 1-yanvargacha kamyob yovvoyi hayvonlarni ovlash taqiqlanadi va bu davrda ular uchun ov kvotalari ajratilmaydi. Taqiq fermer xo‘jaliklari, pitomniklar va baliqchilik xo‘jaliklarida parvarish qilinayotgan hayvonlarga hamda ilmiy maqsadlardagi ovlashga tatbiq etilmaydi.
Shuningdek, 2026-yil 1-avgustdan 2030-yil 1-yanvargacha respublikaning markaziy shaharlaridan oqib o‘tuvchi daryo va soylar har yili kamida 15 tonna chavoq bilan boyitiladi. Ushbu chora-tadbirlar tabiiy ekotizimni tiklash va biologik resurslarni asrashga xizmat qiladi.
