Qishloq xo‘jaligida zamonaviy issiqxonalarni rivojlantirish va eksportbop mahsulotlar yetishtirish hududlar iqtisodiyoti hamda aholi bandligini oshirishning muhim omillaridan biri bo‘lib qolmoqda.
Shu maqsadda “Turonbank” ATB Boshqaruv raisi Chori Mirzayev Termiz tumanida amalga oshirilayotgan investitsiya loyihalari bilan tanishdi. Tashrif davomida “Termiz Agro” MCHJning 2 gektarlik issiqxonasi faoliyati ko‘zdan kechirilib, uni rekonstruksiya qilish va limon yetishtirishga ixtisoslashtirish bo‘yicha tavsiyalar berildi.
Shuningdek, “BAXTIYORBEK TRANS SERVIS” MCHJning 1,7 gektarlik issiqxonasini kengaytirish istiqbollari muhokama qilinib, loyihani moliyaviy va amaliy qo‘llab-quvvatlash masalalari yuzasidan tegishli takliflar ilgari surildi.
Mazkur tashabbuslar hududda zamonaviy agrotexnologiyalarni joriy etish, eksport salohiyatini oshirish va yangi ish o‘rinlarini yaratishga xizmat qilishi kutilmoqda.
