Yosh avlodda tabiatga ehtiyotkorona munosabat va ekologik madaniyatni shakllantirish bugungi kunning muhim vazifalaridan biridir. Bu boradagi amaliy mashg‘ulotlar maktabgacha ta’lim muassasalarida ham izchil yo‘lga qo‘yilmoqda.
Bandixon tumanidagi 14-sonli davlat maktabgacha ta’lim tashkilotida “Suvni asraymiz — kelajakni asraymiz” shiori ostida amaliy tadbir tashkil etildi. Unda tarbiyalanuvchilarga suv resurslarini tejash, tabiatni asrash, ekologik madaniyat va shaxsiy gigiyena qoidalari interaktiv mashg‘ulotlar orqali tushuntirildi.
Tadbir tuman maktabgacha ta’lim tashkilotlari rahbarlari va mas’ul xodimlari ishtirokidagi amaliy seminar shaklida o‘tkazilib, ilg‘or tajribalarni ommalashtirish hamda ta’lim jarayoniga zamonaviy yondashuvlarni tatbiq etishga xizmat qildi. Bu kabi tashabbuslar bolalarda ekologik mas’uliyatni erta yoshdan shakllantirishga muhim hissa qo‘shmoqda.
