Nogironligi bo‘lgan bolalarni har tomonlama qo‘llab-quvvatlash, ularning mustaqil hayotga tayyorlanishi va jamiyatga muvaffaqiyatli moslashuvi bugungi ijtimoiy siyosatning ustuvor yo‘nalishlaridan biridir.
Qumqo‘rg‘on tumanidagi “G‘amxo‘rlik” markazida tarbiyalanayotgan bolalar uchun ta’lim-tarbiya, sog‘lomlashtirish va kasb-hunarga o‘rgatish ishlari tizimli yo‘lga qo‘yilgan. Markazda 10 dan ortiq kasb-hunar yo‘nalishi bo‘yicha amaliy mashg‘ulotlar tashkil etilib, tarbiyalanuvchilarning qiziqishi va qobiliyatini rivojlantirishga alohida e’tibor qaratilmoqda.
Mutaxassislar ta’kidlashicha, bunday mashg‘ulotlar bolalarda mehnat ko‘nikmalarini shakllantirish, ijodiy salohiyatini ro‘yobga chiqarish hamda kelgusida mustaqil hayot kechirishiga mustahkam zamin yaratmoqda. Bu esa ularning jamiyatda munosib o‘rin egallashi va o‘z imkoniyatlarini to‘liq namoyon etishiga xizmat qiladi.
