So‘nggi yillarda mamlakatimizda kitobxonlik madaniyatini rivojlantirish, yoshlar va pedagoglarning ma’naviy salohiyatini oshirishga alohida e’tibor qaratilmoqda. Shu jarayonda o‘tkazilayotgan respublika miqyosidagi tanlovlar bilimli va iqtidorli avlodni kashf etishda muhim ahamiyat kasb etmoqda.
“Yosh kitobxon” respublika tanlovining final bosqichida 20–30 yosh toifasi bo‘yicha g‘oliblar e’lon qilindi. Unda Surxondaryo viloyatidan Uzun tumanidagi 34-maktabning ona tili va adabiyoti fani o‘qituvchisi Fazilat Diyorova faol ishtirok etib, faxrli 1-o‘rinni qo‘lga kiritdi.
Kitobxonlik, chuqur bilim va yuksak tafakkur namunasini ko‘rsatgan g‘olibaga Prezident sovg‘asi sifatida “BYD Chazor” elektromobili topshirildi.
Mazkur yutuq nafaqat uning shaxsiy muvaffaqiyati, balki butun Surxondaryo yoshlari uchun ham katta rag‘bat va ilhom manbayi bo‘lib, kitobga mehr va bilimga intilishning yorqin ifodasi sifatida e’tirof etilmoqda.
