Qishloq xo‘jaligi sohasini rivojlantirish, oziq-ovqat xavfsizligini ta’minlash hamda aholi bandligini oshirish bugungi kunning muhim vazifalaridan biridir. Shu maqsadda Sariosiyo tumanida sektor rahbarlari va fermer xo‘jaliklari vakillari ishtirokida uchrashuv tashkil etildi.
Muloqot davomida hududlarda olib borilgan o‘rganishlar natijalari, mavjud muammo va kamchiliklar hamda bog‘dorchilik va chorvachilik tarmoqlarini rivojlantirish bo‘yicha ustuvor vazifalar muhokama qilindi. Xususan, mahsuldorlikni oshirish, yer va suv resurslaridan samarali foydalanish hamda agrotexnik tadbirlarni sifatli tashkil etish masalalariga alohida e’tibor qaratildi.
Shuningdek, fermer xo‘jaliklari faoliyatida qonunchilikka rioya qilish, eksportbop mahsulotlar yetishtirish, soliq qarzdorliklarini bartaraf etish va mavjud imkoniyatlardan unumli foydalanish bo‘yicha mas’ullarga tegishli topshiriq va tavsiyalar berildi.
