DXX, Chegara qoʻshinlari va Bojxona qoʻmitasi hamkorligida Surxondaryoda yirik narkotrafik toʻxtatib qolindi. Afgʻonistondan “Termiz-avto” posti orqali kirib kelgan yuk mashinasi tirkamasidagi “Doosan” ekskavatori skanerdan oʻtkazilganda, uning koʻtargich qismi (“strela”) ichiga giyohvandlik moddalari yashirilgani aniqlandi.
Maxsus texnik vositalar yordamida ekskavator ichidan jami 593 kilogramm “gashish” va 3 kilogramm “opiy” vositalari olib chiqildi. Jinoiy guruh aʼzolari tong saharda harbiylar sergakligini yoʻqotishiga umid qilgan, biroq ularning rejasi barbod boʻldi.
Hozirda holat yuzasidan Jinoyat kodeksining 246- va 273-moddalari bilan jinoyat ishi qoʻzgʻatilib, narkotik moddalar egalarini qoʻlga olish choralari koʻrilmoqda.
