Uzun tumanining “Yangi shahar” mahallasida istiqomat qiluvchi 70 yoshli Abduali bobo o‘zining mehnatsevarligi va tomorqachilikdagi tajribasi bilan barchaga ibrat bo‘lib kelmoqda. U o‘z xonadonida barpo etgan issiqxonadan yil davomida samarali foydalanib, muntazam daromad olishga erishmoqda.
O‘tgan yil noyabr oyida issiqxonaga ekilgan “Kolumbiya” navli kartoshkadan mo‘l hosil olinib, bozorlarga chiqarildi. Hozirda esa issiqxonada bodringlar yetilib, o‘z hosilini bermoqda. Shuningdek, ochiq maydonda yetishtirilgan kartoshka ham yig‘ishtirib olinib, savdoga yo‘naltirilmoqda.
Abduali bobo issiqxonani bir kun ham bo‘sh qoldirmaydi. Bodring mavsumi yakunlangach, u yerga pomidor ekishni rejalashtirgan.
— Tomorqamdan yiliga 3–4 marta hosil olaman, — deydi otaxon faxr bilan.
Darhaqiqat, mehnatga sadoqat, tajriba va yerdan oqilona foydalanish bu xonadonni barakali daromad manbaiga aylantirgan.
