Yurtimizda hududlar infratuzilmasini rivojlantirish, aholiga qulay va xavfsiz sharoitlar yaratish davlat siyosatining ustuvor yo‘nalishlaridan biri hisoblanadi. Bu borada qabul qilinayotgan qarorlar joylarda amaliy natijalar berib, bunyodkorlik ishlari izchil davom etmoqda.
Jumladan, Shavkat Mirziyoyevning 2025-yil 25-dekabrdagi PQ-386-sonli qarori ijrosi doirasida Muzrabot tumanida 75 V026 avtomobil yo‘lining 6 kilometrlik qismida kapital ta’mirlash ishlari boshlandi. Hozirda eski asfalt qoplamasi maxsus texnikalar yordamida olib tashlanib, yangi asfalt yotqizish uchun tayyorgarlik jarayonlari jadal olib borilmoqda.
Mazkur loyiha 2026–2027-yillarga mo‘ljallangan bo‘lib, umumiy qiymati 9 milliard so‘mni tashkil etadi. Ta’mirlash ishlari mas’ul tashkilot tomonidan qisqa muddatlarda va yuqori sifatda amalga oshirilmoqda.
Ushbu yangilanishlar transport qatnovini yaxshilash, aholining kundalik hayotini yengillashtirish hamda hududning iqtisodiy rivojiga xizmat qiladigan muhim omil bo‘lib xizmat qiladi.
