Muzarobotlik Gulnora O‘sarova 1-guruh nogironi. Shunday bo‘lsa-da u tinim bilmaydi, o‘z tomorqasida 8 sotix yer maydonida o‘ndan ortiq turdagi ko‘katlar hamda mevali daraxtlarni parvarishlab kelmoqda. U hatto qish faslida ham aholini mahsulot bilan ta’minlash maqsadida uyida issiqxona tashkil etgan.
Ko‘rish imkoniyati cheklangan bo‘lsa-da, u yerida nima ekilganini, qanday parvarish qilish kerakligini mukammal biladi va o‘z mehnati evaziga barqaror daromad topmoqda. 2024-yil avgust oyida uning mehnati e’tirof etilib, “Jasorat” medali bilan taqdirlangan.
Tumani hokim Abdulla Mamatqulov At-Termiziy mahallasida istiqomat qiluvchi G.O‘sarovaning xonadonida bo‘lib, uning hayoti va mehnati bilan yaqindan tanishdi. Qahramonimizning kuchli iroda va mehnatsevarligi e’tirof etilib, ibrat qilib ko‘rsatildi. Insonni cheklaydigan narsa ko‘z yoki tana emas, balki iroda yo‘qligidir. Gulnora opa o‘z mehnati va matonati bilan nafaqat o‘z hayotini, balki atrofdagilar uchun ham ibrat maktabini yaratgan.
