Yurtimizda ekologik barqarorlikni ta’minlash va yashil hududlarni kengaytirish davlat siyosatining ustuvor yo‘nalishlaridan biriga aylanmoqda. Bu boradagi muhim qadam sifatida “Yashil makon” umummilliy loyihasi yangi bosqichga olib chiqilmoqda.
Prezidentning 2026-yil 25-martdagi PF-47-son Farmoni asosida Surxondaryo viloyatida ham keng ko‘lamli ishlar boshlandi. Xususan, Sherobod tumanida 38 gektar maydonda dendrologiya bog‘i va 61,6 gektar maydonda botanika bog‘i barpo etilishi rejalashtirilgan. Shu tariqa hududda qariyb 100 gektar yangi yashil maydon yaratiladi.
Mazkur bog‘lar nafaqat ekologik muvozanatni yaxshilaydi, balki ilmiy tadqiqotlar, ta’lim jarayonlari va turizm rivojiga ham xizmat qiladi. Ular muhofaza etiladigan tabiiy hudud maqomiga ega bo‘lib, davlat himoyasida bo‘ladi.
Farmonga muvofiq, 2030-yilgacha mamlakatda yashillik darajasini 30 foizga yetkazish, aholi jon boshiga yashil hududlarni 9–10 kvadrat metrga oshirish ko‘zda tutilgan. Natijada havodagi zararli zarrachalar kamayib, iqlimi og‘ir hududlarda harorat pasayishi kutilmoqda.
Shuningdek, 2027-yildan boshlab “yashillik elchilari” faoliyati yo‘lga qo‘yilib, fuqarolarning ekologik tashabbuslari rag‘batlantiriladi. Daraxt ekishda faol bo‘lganlar “Ekofaol fuqaro”, “Ekohamkor” va “Metsenat” kabi e’tiroflarga sazovor bo‘ladi.
“Yashil makon” loyihasi nafaqat bugungi kun, balki kelajak avlodlar uchun sog‘lom muhit yaratishga xizmat qiluvchi muhim tashabbusdir. Sherobodda barpo etiladigan yangi yashil hududlar esa tabiat va inson uyg‘unligining yorqin timsoliga aylanadi.
