Termiz shahrida yoshlar o‘rtasida o‘tkazilayotgan “DXX kubogi – 2026” sport musobaqalarining ochilish marosimi ko‘tarinki va tantanavor ruhda bo‘lib o‘tdi. Unda shahar hokimi Sharofiddin Lolayev, nuroniylar, mutasaddilar hamda keng jamoatchilik vakillari ishtirok etdi.
Mazkur musobaqa 1100 nafardan ortiq yoshlarni qamrab olib, mahallalar kesimida bosqichma-bosqich davom etadi. Bu esa yoshlar o‘rtasida sog‘lom turmush tarzini qaror toptirish, jamoaviylik va sportga bo‘lgan qiziqishni yanada kuchaytirishda muhim ahamiyat kasb etadi.
Bayram davomida kuy-qo‘shiqlar va sahna chiqishlari tadbirga yanada fayz bag‘ishladi. Ta’kidlanganidek, “DXX kubogi” nafaqat sport bellashuvi, balki yoshlar uchun iroda, intizom va vatanparvarlik maktabidir.
Tadbir yakunida musobaqalarga rasman start berilib, yoshlar yana bir bor o‘z salohiyatini namoyon etish imkoniga ega bo‘ldi.
