Aholi bandligini ta’minlash va tomorqalardan samarali foydalanish bugungi kunda muhim yo‘nalishlardan biri bo‘lib bormoqda. Bu borada oddiy xonadonlarda tashkil etilayotgan issiqxonalar barqaror daromad manbayiga aylanmoqda.
Angor tumanining “Yuqori Tallashqon” mahallasida yashovchi Oybek Jo‘rayev xonadonida 10 sotix maydonda barpo etilgan 4 ta issiqxonada pomidor yetishtirilmoqda. Mehnat va tajriba uyg‘unligi evaziga yuqori hosil olinib, oila daromadi mustahkamlanmoqda.
Xonadonda mehnatsevarlik an’analari alohida e’tiborga loyiq. 75 yoshli Qizlarxon momo Normo‘minova bugungi kunda ham faol, kelinlari va nabiralariga dehqonchilik sir-asrorlarini o‘rgatib, ularga ibrat ko‘rsatmoqda.
Bunday namunali xonadonlar ko‘payib borayotgani hududlarda olib borilayotgan islohotlar samaradorligini ko‘rsatib, tomorqadan unumli foydalanish orqali farovonlikni oshirish mumkinligini yana bir bor tasdiqlaydi.
