O‘zbekiston Respublikasi Prezidentining yoshlar tashabbuslarini qo‘llab-quvvatlashga qaratilgan topshiriqlari ijrosi doirasida Bandixon tumanida amaliy ishlar olib borilmoqda. Shu jumladan, Chinor mahallasidagi “KHilal Vortex” MCHJ korxonasiga yoshlar uchun sayohat tashkil etildi.
Qariyb 188,7 milliard so‘mlik loyiha asosida faoliyat yuritayotgan mazkur korxona yuqori sifatli ip-kalava ishlab chiqarishga ixtisoslashgan bo‘lib, yangi ish o‘rinlari yaratish va eksport salohiyatini oshirishda muhim ahamiyatga ega.
Sayohat davomida yoshlar zamonaviy ishlab chiqarish jarayonlari bilan tanishib, mutaxassislardan o‘zlarini qiziqtirgan savollarga javob oldilar. Ushbu tashabbus ularning sanoat va tadbirkorlikka bo‘lgan qiziqishini oshirish, kasb tanlashda to‘g‘ri yo‘naltirish hamda kelajakda bandligini ta’minlashda muhim o‘rin tutadi.
