Surxondaryo viloyatida Maktabgacha va maktab ta’limi boshqarmasi hamda Soliq boshqarmasi hamkorligida yoshlar o‘rtasida “Soliq bilimlari – yosh avlodga” mavzusida ijodiy ishlar ko‘rik-tanlovining viloyat bosqichi o‘tkazildi. Tanlovning maqsadi yoshlarning soliq madaniyatini oshirish, iqtisodiy bilimlarini mustahkamlash va ijodiy salohiyatini rivojlantirishdir.
Musobaqada o‘quvchilar rasm, insho va videorolik yo‘nalishlarida o‘z ijodiy ishlari bilan ishtirok etdilar. Yakunda Denov tumanidan Normurodov Asror (eng yaxshi rasm), Sherobod tumanidan Hojiddinova Shaxzoda (eng yaxshi insho) va Angor tumanidan Amonova Ozoda (eng yaxshi videorolik) 1-o‘rinlarni qo‘lga kiritdi.
Mazkur tanlov yoshlarni jamiyatda mas’uliyatli va faol fuqarolar bo‘lib shakllanishiga hamda soliq tizimi haqidagi bilimlarini amalda qo‘llashga undaydi.
