Ijtimoiy himoya milliy agentligi direktori Mansurbek Olloyorov Surxondaryo viloyatidagi ijtimoiy infratuzilma obyektlari faoliyati bilan tanishdi.
Tashrif avvalida “Yangi O‘zbekiston” mahallasidagi 66-sonli maktabda yaratilgan inklyuziv ta’lim muhiti, maxsus jihozlangan sinflar va o‘quv jarayoni ko‘zdan kechirildi. Shuningdek, hududiy ijtimoiy xizmatlar markazida 13 nafar parvarishga muhtoj shaxs uchun “Faol hayotga qadam” hamda 30 nafar nogironligi bo‘lgan bolalar uchun “Kunduzgi parvarish xizmati” yo‘lga qo‘yilgani qayd etildi.
Bundan tashqari, YUNICEF va Ishonch fondi hamkorligida Termiz shahridagi 3-son maktabda tashkil etilgan zamonaviy inklyuziv muhit — maxsus sinflar, ilg‘or uskunalar hamda psixologik-pedagogik qo‘llab-quvvatlash tizimi bilan tanishildi.
Tashrif yakunida ijtimoiy xizmatlar sifatini oshirish, qamrovni kengaytirish va aholining ehtiyojmand qatlamini qo‘llab-quvvatlash bugungi kunning dolzarb vazifasi ekani ta’kidlandi.
