O‘zbekiston temir yo‘llari AJ raisi Zufar Narzullayev ma’lum qilishicha, kelgusida Toshkentdan Termizga tezyurar poyezdda 7 soat atrofida yetib borish imkoniyati yaratiladi.
Loyiha doirasida Janubiy Koreyaning Hyundai kompaniyasi bilan dastlabki muzokaralar o‘tkazilgan bo‘lib, hozirda texnik-iqtisodiy asoslar ishlab chiqilmoqda. Yangi yo‘nalish hududning geografik sharoitlarini inobatga olgan holda loyihalashtiriladi.
Hozirda Toshkent – Termiz yo‘nalishida safar 14 soat davom etsa, tezyurar poyezdlar ishga tushirilgach bu vaqt 7,5 soatgacha, keyinchalik esa 7 soatgacha qisqaradi. 2028-yil oxirigacha yakunlanishi rejalashtirilgan loyiha doirasida 4 ta zamonaviy poyezd olib kelinadi va har biri qariyb 400 yo‘lovchiga xizmat ko‘rsatadi.
Shuningdek, davlat rahbari tomonidan Toshkent – Andijon yo‘nalishida ham tezyurar poyezdlar qatnovini yo‘lga qo‘yish bo‘yicha topshiriq berilgan.
