Surxondaryo viloyatiga tashrifi davomida Prezident Shavkat Mirziyoyev Jarqo‘rg‘on tumanidagi “Yangi O‘zbekiston” massivida joylashgan 66-maktabda bo‘lib, o‘qituvchilar va o‘quvchilar bilan uchrashganidan xabaringiz bor.
Suhbat chog‘ida iqtidorli o‘quvchi Feruza Jumagulovaning Termiz davlat universiteti talabasi bo‘lish orzusi qo‘llab-quvvatlanib, 2027–2028 o‘quv yilidan boshlab grant asosida o‘qishga qabul qilinishi belgilangan edi.
Mazkur xushxabar O‘zbekiston Respublikasi Prezidenti Administratsiyasi, Oliy ta’lim, fan va innovatsiyalar vazirligi hamda boshqa mutasaddilar ishtirokida maktab jamoasi va oila a’zolariga yetkazildi. Feruzaga sertifikat topshirilib, ezgu tilaklar bildirildi.
Bu voqea yoshlarning bilim va intilishlari davlat e’tiborida ekanini, iqtidorli avlodni qo‘llab-quvvatlash Yangi O‘zbekiston siyosatining ustuvor yo‘nalishlaridan biri ekanini yana bir bor namoyon etdi.
