Prezidentimiz tomonidan ilgari surilayotgan xalqchil siyosat, ochiqlik va oshkoralik tamoyillari asosida davlat organlari faoliyati shaffofligini ta’minlash ustuvor vazifa etib belgilangan. Shu maqsadda hududlarda axborot siyosatini kuchaytirishga alohida e’tibor qaratilmoqda.
Ana shu yondashuv doirasida Surxondaryo viloyati hokimligi tashabbusi bilan shahar va tumanlar hokimliklari axborot xizmati rahbarlari — davlat tili bo‘yicha maslahatchilarga xizmat avtomashinalari topshirildi.
Mazkur tashabbus axborot xizmatlari faoliyatini yanada samarali tashkil etish, hududlarda amalga oshirilayotgan islohotlar va ijtimoiy-iqtisodiy loyihalar haqida tezkor hamda xolis ma’lumot yetkazish imkonini kengaytiradi. Endilikda mutaxassislar joylarga tezkor chiqib, aholi murojaatlari ijrosini o‘rganish, jamoatchilik bilan ochiq muloqotni kuchaytirish va davlat organlari faoliyati shaffofligini ta’minlashda yanada samarali ishlashlari mumkin bo‘ladi.
Bu esa jamiyatda ishonch muhitini mustahkamlash, ochiq va hisobdor boshqaruv tizimini rivojlantirishga xizmat qiladi.
