Surxondaryo viloyati hokimining fuqarolar bilan onlayn qabulida “Temirdarvoza” mahallasida yashovchi fuqaro Muhabbat Elbekova oilaviy sharoiti og‘irligi, turmush o‘rtog‘ining bemorligi sababli uni davolatish hamda tomorqasida ekin ekish uchun zarur sharoit yaratish masalasida murojaat qilgan edi. Viloyat rahbari mas’ullarga murojaatni atroflicha o‘rganib, amaliy yordam ko‘rsatish yuzasidan aniq topshiriqlar bergan hamda ijrosini shaxsan nazoratga olgan edi.
Viloyat hokimi Ulug‘bek Qosimov fuqaro xonadoniga tashrif buyurib, oilaning yashash sharoitlari bilan yaqindan tanishdi, sog‘ligi tufayli to‘shakka mixlangan turmush o‘rtog‘ining holidan xabar oldi.
Murojaat ijrosi doirasida tomorqa yer maydoniga tomchilatib sug‘orish tizimi o‘rnatildi. Bu esa tomorqadan samarali foydalanish, qo‘shimcha daromad manbai yaratish hamda oilaning iqtisodiy barqarorligini ta’minlashga xizmat qiladi.
Muborak Ramazon oyi munosabati bilan qo‘shimcha moddiy yordamlar ajratildi. Shuningdek, oila boshlig‘ini malakali tibbiy ko‘rikdan o‘tkazish va davolash ishlarini tizimli tashkil etish bo‘yicha mas’ullarga aniq vazifalar yuklatildi.
Bundan tashqari, xonadonga quyosh panellari va geokollektor o‘rnatish orqali energiya ta’minotini yaxshilash choralari belgilandi.
