Surxondaryo viloyati hokimi Ulug‘bek Qosimov Qiziriq tumaniga tashrif buyurib, infratuzilma va ijtimoiy sohada amalga oshirilayotgan ishlar hamda istiqbolli loyihalarni ko‘zdan kechirdi.
Tashrif davomida tumanning kirish qismida ramziy stella, zamonaviy sanitariya-gigiyena shoxobchalari, yo‘l bo‘ylarida yashil maydonlarni kengaytirish ishlari o‘rganildi. Shuningdek, Takiya ota ziyoratgohida qulay shart-sharoitlar yaratish, kollektorlarni zamonaviy usulda yopish va yangi tadbirkorlik loyihalarini amalga oshirish masalalari muhokama qilindi.
36-maktabda ta’lim sifati va shart-sharoitlar tahlil qilinib, maktabni ta’mirlash va o‘quv jarayonini yaxshilash bo‘yicha aniq vazifalar belgilandi. Tumanda ko‘p qavatli uylar qurish, bo‘sh binolarda tadbirkorlik loyihalarini amalga oshirish va yangi istirohat bog‘ini tashkil etish bo‘yicha taqdimotlar ko‘rib chiqildi.
Tashrif natijalari tumanda infratuzilma, ta’lim va tadbirkorlik sohalarini rivojlantirish, yangi ish o‘rinlari yaratish va hududni obod qilishga qaratilgan.
