Viloyat Ekologiya boshqarmasi hamda Milliy gvardiya xodimlari hamkorligida Muzrabot tumani “Buyuk ipak yo‘li” mahallasi hududidagi chegaraoldi mintaqasida joylashgan sholipoya dala maydonida noqonuniy ov holati fosh etildi.
Tekshiruv jarayonida fuqaro B.R. o‘ziga tegishli ov qurolidan foydalangan holda 1 bosh yovvoyi o‘rdakni noqonuniy ovlagani ma’lum bo‘ldi. Holat yuzasidan unga nisbatan O‘zbekiston Respublikasi Ma’muriy javobgarlik to‘g‘risidagi kodeksining 90-moddasi 1-qismiga asosan BHMning 20 baravari, ya’ni 8 million 240 ming so‘m miqdorida ma’muriy jarima qo‘llanildi.
Shuningdek, mazkur noqonuniy ov natijasida tabiatga yetkazilgan ekologik zarar 412 ming so‘m miqdorida hisoblandi. Mas’ul idoralar fuqarolarni yovvoyi tabiatni asrash, ov qilish qoidalariga qat’iy rioya etish hamda ekologik muvozanatni saqlash har bir insonning burchi ekanini unutmaslikka chaqirmoqda.
