Surxondaryo viloyatida maktabgacha ta’lim qamrovini oshirish maqsadida mavjud binolarni rekonstruksiya qilish, ularni bog‘chalarga moslashtirish hamda davlat-xususiy sheriklik asosida yangi maktabgacha ta’lim muassasalarini barpo etish bo‘yicha izchil ishlar olib borilmoqda.
Viloyat hokimi Ulug‘bek Qosimov Sho‘rchi tumaniga tashrifi davomida 20-sonli davlat maktabgacha ta’lim tashkilotida amalga oshirilayotgan loyihalar ijrosi bilan tanishdi. Mas’ullar tomonidan 2026-yilga qadar 3–7 yoshli bolalarning maktabgacha ta’lim bilan qamrovini oshirish bo‘yicha reja va ko‘rsatkichlar taqdim etildi.
Shuningdek, bo‘sh binolarda davlat-xususiy sheriklik asosida bog‘chalar tashkil etish masalalari yuzasidan tadbirkorlar bilan uchrashuv o‘tkazilib, qamrovni kengaytirish va shart-sharoitlarni yaxshilash bo‘yicha aniq vazifalar belgilandi.
Tashrif doirasida “Yakkabog‘” mahallasida joylashgan nogironligi bo‘lgan bolalar uchun kunduzgi parvarish markazi faoliyati ham o‘rganildi. Viloyat rahbari markaz faoliyatini kengaytirish, shuningdek, tuman markazida ham shunday xizmatlarni yo‘lga qo‘yish bo‘yicha mas’ullarga topshiriqlar berdi.
